الـ Macbook بيتخدش بسرعه جدا اثناء مبندخله في الشنطة ونطلعه واثناء الاستخدام ، فمحتاج يكون ليه جراب نتحرك بيه يكون ناعم جدا من جوا ومفهوش اي اكسسوارات عشان نحافظ عليه ، طريقة عمله سهله وبسيطة جدا لاشغال الجلد الطبيعي ، هنا في الباترون والادوات اللي محتاجينها.
الادوات:
جلد طبيعي بني سمك 1.7 مم – خيط ابيض شمعي – شوكة تخريم سمك 1 مم – سكينة او قطر – قاطع نص دايرة قطر 2 سم – قاطع قوس قطر 2 سم – صنفرة – ولاعة – لوحة تخريم نايلون – شاكوش نايلون
الباترون مقاساته زي ما هي لو اتطبع على ورقة A1 ، نخلي الاطار الخارجي للصورة على نفس اطار ورقة A1 الخارجي ، هتطلع المقاسات زي الباترون بالضبط ، لو هتتطبع على ورقة A4 ، نحسب المقاسات التناسبية قبل القص ، مقاسات الباترون بالـ سم ، نسيت ادخلها في الرسم.
الطريقة :
هنقص الجلد على نفس شكل الباترون بنفس مقاساته وهنحسن الشكل بعد القص ، على بعد 0.8 سم من الحافة هنرسم خط موازي للحافة خفيف عشان نخرم عليه ، هنبدا نخرم ، المسافة بين الخرام هنا هتكون 0.8 سم كبيرة شوية عشان تدينا شكل كويس ، مع ملاحظة لو عايزين المسافة بين الخرام تكون اقل من كدة او اكتر مثلا 1 سم بين الخرام نخلي برضة المسافة اللي نسيبها بين الحافة وخط التخريم تبقى زيها 1 سم ، عشان شكل الخياطة يكون كويس بالغرز اللي على شكل حرف X زي ما باينة في الصورة ، على الجزء الغطا اللي بيتني فوق هنخلي الزوايا على شكل دائري باستخدام القاطع القوس للاربع زوايا ، وهنيجي برضه على الطرف اللي تحت خالص وفي نصه هنستخدم القاطع النص دائري ونعمل الحفرة النص دائرية مكان ما بنطلع الجهاز زي ما باين في الصورة ، هنصنفر كل الحواف بالصنفرة الخشنه عشان ننعم الحواف شوية ولو محتاجين لون كمان نصبغهم ، كدة خلاص جاهز على الخياطة .
الخياطة :
هنا هنعمل الخياطة على شكل حرف X ، هنلضم الابرة بالطريقة اللي في المنشور ده ، هنتني الجزء اللي تحت على الجزء اللي في النص زي ما في الباترون بحيث نخلي الخرام على بعض ، وهندخل الابرة في الخرم الاول للنص ونلف لفة كاملة بالخيط على اول خرم ، ونبدا ندخل ابرة في الخرم اللي بعد من جهه ونرجعها تاني من الجهه التانية في الخرم اللي بعده لكل الابرتين ، وبعد ما نخلص برضه في اخر خرم نعمل بالخيط لفة كاملة ونعقدها ونخلي باقي الخيط من جوا و نقفل عليهم بالولاعة.
بعد ما خلاص خلصنا الخياطة ممكن نلمع الجلد عشان يبقى شكله احسن ، وبيكون اثناء الشغل اتبهدل من ايدينا والادوات ، بالملمع بتاع الجزم العادي ، وبقماشة قطن او صوف نلمع بطريقة دائرية .
