مكتبة روائع المكتبات هي مكتبة بتبيع ادوات مكتبيه وكتب وليها جزء خاص بالاثاث والتحف والادوات المنزلية والورود والمفروشات والستاير وانسب مكان للهدايا ، طراز الحاجات اللي بيبيوعها هو طراز شابي شيك shabby chic ، الطراز ده مميزين بيه جدا لان مافيش ناس كتير في الرياض بتبيعه ، اخدت من عندهم ادوات مطبخ ومجات وكروت وحجات تانية هبقى اعرضها في منشورات تانية ، لكن اهم قطعة بالنسبالي هي البرواز اللي في الصورة لانه على نفس الطراز ده ومكتوب عليه Family ، حطيته في غرفة الاولاد وحقيقي ضايف للغرفة جمال مش طبيعي ، وخاصة انه كمان من الوان الباستيل ، كان نفسي اخد المكتبة كلها واروح .
المكتبة كمان بتلهمني لبعض الافكار ، في مج هبقى اصوره في منشور منفصل اخدت الفكرة من عندهم وخليت صاحبتي تنفذه ، ده غير الراحة النفسيه اللي بتيجي للواحد لما يدخل المكتبة ، كمان بتفكرني ببيت جدتي ربنا يديها الصحة زمان ، الستاير والكنب القديم والمفارش والنملية بتاعتها.
طراز شابي شيك :
بيتميزالطراز ده بانه من حاجات مصنوعة يدوياً زي التطريز والتريكو و الكروشية ، طراز بناتي ، كمان ممكن اي حاجة قديمة عندنا نجددها على شكل الطراز ده ، لانه بيعتمد على طلاء الاثاث القديم بشكل مش مثالي بحيث يظهر على الأثاث أثار الاستخدام الكتير، غالباً ما بيكون الأثاث أنتيكي مصنوع من الخشب ومطلي باللون الأبيض أو الألوان الهادية زي الوردي او الأزرق الفاتح أو الأخضر الفاتح.
